Descripción

Cando Ariadna atopa o antigo plano do Palazzo Goldoni, un palacio veneciano, entre as ruínas dunha mansión coruñesa, viaxar á cidade dos canais convértese no seu obxectivo primordial. Recentemente graduada en Arquitectura, decide embarcarse nunha aventura que podería cambialo todo, á procura de desentrañar os segredos que ese mapa semella agochar.

Xa en Venecia, nun encontro fortuíto, crúzase con Ludovica, unha estudante de Lingüística coa que descubrirá un manuscrito oculto entre as ruínas do palazzo. Un achado que as pon tras a pista dunha enigmática esmeralda, desaparecida, envolta en mitos e tradicións renacentistas.

Mentres percorren rúas, pontes e palacios, avanzando en góndolas e vaporettos, non só se enfrontan aos desafíos das incógnitas que transcenden séculos, senón tamén aos propios de entregarse a unha conexión tan inesperada como poderosa: a dos seus propios corazóns.

Historia, arte e misterio mestúranse en ‘A xoia de Venecia‘ de José Ramón Ramos, onde o amor está no aire.